El strighez

Te vol partir?
'ndar via de Trieste?
Te ga ragion,
parti, va,
te tornarà anca ti.

De lontan te pensarà,
te vedarà tuto,
tuto quel che no te vedi 'desso.

Te vedi sto mureto?
sto mureto de piere
longo sta strada
che taia el ciel?
quei do alberi drio, legeri
contro del ciel?
El mar xe là.
E quele casete de lontan
rosa zelesti?

Te vedi,
roba de gnente, no?
Anca a questo te pensarà
patindo.

Te vol farte strada, te vol,
diventar qualcossa?
Te ga ragion,
parti, va,
te tornarà anca ti.
E quel qualcossa che te sarà,
qua de novo,
'l te cascarà de dosso come 'na straza.

Questo xe el bel, te vedi,
questo xe el bel de sta zità,
e questa xe anca la su' malora.

Anita Pittoni

Férmite con mi, Ed. dello Zibaldone, Trieste 1962